Luke 1

Luk re gwor tuma basrasen Tiofilus rene newopitim.

1Keryen yen Tiofilus, kiyi nugwape tame rem God reri nenbemkap rem basrasem. 2Tame rem Jisas rene lam, rem reri tobotan yam yaku lam, rem nemne etop wesowem. Remri lan wesowemkap rane tame rem etop basrasem. 3Aren mere, an er tuma basrasen nene newopitite selbo. Remri basrasem tumakap an etop heyar lam, an etop heyar basrasbo. 4Er tuma rem nene kiyi wesowem, ne metem. Er tuma an basrasen nene newopitite, ne op mette, neri kiyi metem tuma et sekene.

Elisabet te tatame remne Okke Tirmunbem Tame, Jon, rene sek temenem tuma. Maria te Jisas rene sek tememem tuma.

(Sapta 1:5—2:52)

God reri kwomri tame re Sekaraia rene op wem. Jon re tete.

5Kiyi Herot re Juda tatame remri keryen yen temenem, God Reri Kwoborke yaku nen tame wuri re temenem. Reri sig Sekaraia. Re Abiya reri sukuw. Ta te Aron reri sukuw. Ta teri sig Elisabet. 6God re lam, rep tatame yenbo. Keryen Yen reri tumakene reri wulekene rep meten nenbem. 7Rep yenkene bo. Elisabet te yen game am ta. Rep ker tem.

8Yabel wuri Sekaraia re agerbo tamekene rem God reri yaku God Reri Kwoborke nenbem. 9Reri yaku nen tamesip rem rene op wem. Gwopte ne God rene bos yenbo yabo wos liste. Op wem, re Kwobor purik yin wurem. 10Re boskene wos lisbem, nugwape tatame rem kwom geike wuriwouke wuren God rekene tuma namrebem. 11Re lam, God reri kwomri tame re bos yenbo yabo wos lisbem emi mame yokwok tetemenem. 12Etop lam, Sekaraia re danekene seken kenakem akem. 13God reri kwomri tame re rene op wem. Sekaraia, ne mane akte. God re neri rekene namrebem tuma metem, neri ta Elisabet te tauryen wurte, ne reri sig Jon wete. 14Rene wurte, neri pap kwuye mette, ne okbop tete. Nugwape tatame rem yen late, rem kirkir okbop tete. 15Yuri er yen re God reri yaku yenbo nente. Keryen Yen re etop late, re rene tame yenbo wete. Er yen re ok yaper kap ate. Rene nawo te wurte, God Reri Wow re rekene som temente. 16Re Israel tatame remne God Reri Tuma wesowte, nugwape tatame rem meten Keryen Yen God rene omuteke habote. 17God re rene weraste, re God reri kiyi temenem tuma wesowbem tame, Elaija, eterkap tete. Re kitimenakene tete. Yenha rem gwule tete, re remne tuma wesowte, rem sene heyar site. God rene be habobo tatame re remne tuma wesowte, rem wuribai yenbo potte. Re tatame remne op wete. Kem kemri yaper nenbo wos mesegente. Haneyen re yate tetane. God reri kwom tame re Sekaraia rene etop wem.

18Sekaraia re God reri kwom tame rene op wem. Neri weye tuma et sekene o bo? An mapurke mette? An ari takene nes ker tem. 19God reri kwom tame re sein op wem. An Gebriel. An God reri bitmik tetebo. Re anne werasen yawo, an nene tuma yenbo weye. 20Ari weye tuma ne omuteke be metye, opkap ne tuma tibe tete tetane, ne tuma be namrete. Tuma tibe ten yin an nene weye tuma re sekene tete, neri ta te yen wurtek, ne tuma sene ek namrete tetane.

21Sekaraia re God Reri Kwobor purik wurmenem, nugwape tatame rem rene sene wurate kowmenem. Rem op wem. Sekaraia re be wuratene. Re kap berke nenyek, re God Reri Kwobor purik som tetane? 22Op wem, re sene yan wuram, re tuma tibo tem, re remne tuma letwouke peterabem. Rem op wem. Re wurmenye, re kap nugsikap laye, re tuma tibo teye? 23Sekaraia re God Reri Kwoborke nenbem yaku legem, re reri akwulke sene yim.

24Yuri Elisabet te yen panebem, liyp letrane te akek berasen sim. 25Te op wem. Keryen Yen God re anne pap metem, an yen panebo. An tatame remri bitmik yite, an sebera sene be yate.

God reri kwom tame re Maria tene op wem. Ne yen wurte tetane.

26Elisabet te yen panebem liyp letrane kelare wuri kere yim, God re reri kwom tame Gebriel rene werasen Galili yokwok tetane kwom Nasaretke yim. 27Re muyensi yen ta wuri tene tuma wesowte yim. Er ta rem tene tame get wemenem. Tame reri sig Josep. Re kiyi temenem Keryen Yen Devit reri beig. Muyensi yen ta teri sig Maria. 28God reri kwom tame re tene pir op wem. Keryen Yen God re nene heyar nenem. Re nerenkene tetane. 29Maria te etop meten te habolaweyen op habom. Er mapkap tuma? 30God reri kwom tame re tene op wem. Maria ne kap akte. God re nene heyar nenem. 31Yuri ne yen panete. Ne tauryen wurte, ne rene sig Jisas wete. 32Yuri re keryen ken tete, tatame rem rene op wete. Re Hevenke tetane God Eterri Yen. Op wete. Kiyi Devit re keryen yen temenemkap, yuri Jisas re reri yaku potte, re keryen yen tete. 33Re warege Jekop reri beig remne som panen site. Re keryen yen som temente.

34Maria te God reri kwom tame rene op wem. An yen mapurke panete? An tame be yitene. 35God reri kwom tame re tene sein op wem.

God Reri Wow re nerenke yate tetane.
God reri kitimena bukrewai re nene newote tetane. Opkap ne yen wurte, rem op wete.
Er yen re yenbosubuwai.
Er yen re God Eterri yen.
36Metye. Neri lake Elisabet kiyi rem tene op webem. Te yen be panete. Te yen game am. Rem op webem, gwopte te ker teye, te yen panebo. Te liyp letrane kelare wuri keretene. 37Aboyei wos God re kebese nenbo. Op wem.

38Maria te op wem. An God reri yaku nen ta. Neri weyekap re anne etop nente, et yenbo. Op wemke, God reri kwom tame re tene mesegenen ek yim.

Maria te Elisabet tene lasyim.

39Keraket tem, Maria te wos teren agetage te kwowke yim, te Judia yokwori kwom etek yim. 40Te Sekaraia reri akek wuren Elisabet tene pir wem. 41Elisabet teri sek temenem yen re kirpem. God Reri Wow re Elisabet tene gureremenem. 42Te Maria tene yaye op wem. God re nene heyar nenem. Re agerbo ta remne etop be nenem. Neri sek tetane yen God re rene kirkir heyar nente. 43Ari Keryen Yen reri nawo te anne lasyawo, an okbop teye. 44Neri weye pir an metye, agetage ari sek tetane yen re okbop ten re kirpeye. 45God re reri wem tuma nente tetane. Ne etop omuteke habobo, ne okbop teye. Elisabet te etop wem.

Maria te sekwo wuri lomum.

46Maria te op wem.

An Keryen Yen rene boteyatebo,
an reri sig bukre webo.
47Ari wow God rene okbop tebo.
God re anne Kwobo Labo Tame,
re anne yenbo nenbo, an heyar tetane.
48An reri yaku nen ta eisow.
Re anne habom, an boteyatebo.
Gwopte tetane tatame, yuri temente tatame rem wete,
God re anne yenbo nenem, an metekwasbo.
49God re kitimenakene, re anne bukre wos nenye,
gwopte tetane tatame, yuri tete tatame
rem anne tuma yenbo wete.
God reri sig et yenbosubuwai.
50Kiyiri tatame, gwopteri tatame,
yuri tete tatame rem God reri sig bukre wete,
God re remne pap mette tetane.
51God re kitimenakene tame,
yike tatame rem remri sig kworer bukre webem,
re remne wekroken rem yikwete yakwetebo.
52Re sig bukre temenem kwom panen
si keryen yen remne teitkwunem.
Sig bukre be temenem tame remne wepoten
remri sig bukre wem.
53Sikwoi sam tatame re
remne awos newom, rem seketem.
Wosbaskene tatame re remne wos be newom.
Re remne bupo me werasen yikwetem.
54Kiyi re nemri yei warege remkene tuma natobom.
Er tuma re etop nenem.
Re reri yaku nen tame Israel remne kwobo lam.
55Re nemri warege Abraham rene be serem.
Re rene pap metbem.
Abraham reri nanem
remne re kirkir pap som metbem.
56Op wem, Maria te Elisabet tekene liyp mur ten te akwulke sene ek yim.

Elisabet te yen wurem.

57Elisabet te yen wurte yabel tem, te tauryen wurem. 58Teri kwomri tatame, teri lakemase rem metem, Keryen Yen re tene heyar nenem, rem okbop bukre ten boteyatem.

59Yabel letrane kelare mur kere tem, tame rem yam. Rem yen reri mare tumas kutem reri sig, har Sekaraia eterri sig tapene yate wem. 60Nawo te me sewayen op wem. Yehow. Nem reri sig Jon wete. 61Rem tene sein op wem. Er sig et neri tame beigri sig bo. 62Op wem, rem har rene letke mukuteken rene op wemetem. Yen reri sig ne berke wete? 63Op wem, ha re siglow wemetem, rem poten sen yan rene newom, re yen sig Jon etek basrasem. Rem etop lan danekene sekem. 64Sekaraia re tumakene sene tem, re God rene tuma yenbo wem. 65Kwomri tatame rem lam, re tumakene tem, rem weskene akem. Nugwape Judia nowselke tetane kwowke temenem tatame rem er tuma metem, 66rem op lam, God reri kitimena er yen rekene temenem. Etop lam, rem kenakem habon op wem. Yuri er yen re haneyen tete, re be yaku potte?

Sekaraia re sekwo wuri lomum.

67God Reri Wow re Jon reri ha Sekaraia rene gureren re yuri tete wos wesowem. 68Re op wem.

Nem Israel tame, nem
Keryen Yen rene tuma yenbo wete.
Re reri tatame remne kwobo lan remne potem.
69Re reri yaku nenbem yen
Devit reri beig wuri potem.
Er tame re kitimenakene,
re nemne poten nem pow tete.
70Kiyi God re reri tuma wesow tame yenbo remne tuma wesowem.
Sene er tame rem tatame remne er tuma etop wesowem.
71God re op wem. Kemri peiktamekene kemne
wuribai yaper tetane tame remne an teitkwunte tetane.
72Re sene op wem. An yeiwarege remne pap
meten kiyi natobom tuma yenbo an be serbo.
An som habobo.
73Re nemri warege Abraham rekene tuma natobom.
Kiyi wemkap gwopte re etop nente.
74Re nemne peiktame remri letke potte, nem reri yaku nente, nem kap akte.
75Opkap nem kwokwos kwokwos pow temente,
God re late, nem reri wule yenbo nenbo,
re selbo wule aboyei nem potem.
76Sekaraia re op wem,

Ari yen, yuri ne Keryen Yen rene temnas yin reri kelow heyarte.
Tatame rem nene op wete.
Re Hevenke Tetane God Reri Tuma wesowbo tame.
(Malakai 3:1)

77Ne tatame remne op wete.
Kemri yaper nenbo wos kem mesegente,
God re kemne potte.
Nemri God re pap meten elen me nenbo Tame.
Malebo tuw re nemne werasen re tatame remri
yaper nenbo wos poten septin nemne potte.
79Opkap kerneirke sitene tatame rem yabel geike tete.
Re nemne kelmenabo kelow peterate, nem pap
kwuye mette tetane.
(Aisaia 9:2)

80Op wemke, yuri Jon re haneyen tem, re God rene habom. Re tamekene bo emik yin Israel tatame remne tuma wesowte yabel kowmenem.